الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 ســيـد البلد

اذهب الى الأسفل 
كاتب الموضوعرسالة
أبوالمنذر

avatar

المساهمات : 147
تاريخ التسجيل : 26/08/2010

مُساهمةموضوع: ســيـد البلد   الأربعاء 20 أكتوبر - 16:13:04

قصيدة رائعة للشاعر (عثمان خالد) تغني ببعضها القامة الغنائية الفنان حمد الريح وهي تحمل عنوان: (إلى مسافرة)

غاليـتى
بعد السـنين الكنت ما بحسب
حساب الوقت فيها ولا بعد
بعد العلاقة الطيبة والحب اللى عاش
فى الارض .. فد مـرة... وبعد
ما كان مودة و رقة .. ما كـان طيبة
واستلطاف و تحنان متقد
ما كان مواسم فرحـة ما كـان
يهيم بالنشـوى .. وبعد
ما كـان اناقة لفظة .. تغريد نظـر
همسـة ثغر موسيقى نهد
ما كان اماسـى رحيمة تطـرب ديمة
وانت نعيمـة يا ست البلد
ما كان صباح .. لا مرة راح
من عيـنى لا نوره ابتعد
ما كـان وكان و انـا كنت قايل
نفسـى انـى اعيشه فرحان للابد
ما كنت واضع فى حسـاب الدهر
قسـوة ولا دموع كاويات فى خـد
ماكنت قـايل يوم حأنزف
قلبى يا مكتول كمد
00 0
يا قلـبى يا مكتول كمد اعصـر دموع
هات غنوه لى سيد البلد
يا حليله .. قال سايب البلد
يا حليله .. كيفن يبتعد
وكيفن نسيبه يروح بعيد
فى رحلة مجهولة الامد
كل العمر كان لحظه واحدة
نشوفه والشوق يتقد
نسكر .. نغيب
من لطفـه... من دله الحبيب
من لونه .. من كرز المغيب
الرامـى محـلو الثمر
فى شفايفه زى ياقوت ندر
فى شكله زى نص القمر
مبتل .. مثـير
مخلوق عشان احلى الثغور
واشواقنا تتعطر .. تتطير
من نفحه من مجرى العبير
من لفته من جيده النضير
من لفظه من ثغره المثير
الفيه ريـان الثمر
شوفوا القلوب كيف تأتمر
لو مرة سيد الناس امر
بى نظره بتذوب حجـر
بى بسمة بطول عمر
000
يا حليله قال ناوى السـفر
ناح الغروب ..جمره استعر
وآغربة الفل والزهر
وآغربة النيل والقمـر
وآغربة الطير والشجر
وآغربة النسمه الرقيـقه
وشوقه لعناق الشعر
وآشوقـى لى رعشة شفايفه
الحلوه لمـا اقول شعـر
وآ شوقى للخدر اللذيذ لما العيون
تمـلانى بى شحنات خدر
وآ غربتى
ما كان صباحى ودنيتى
واغلى الكنوز ..اغلى الدرر
يا حليله ..قال سايب البلد
ناوى السفر
خلانى العـن فى القـدر
مالو القدر؟
اهديته اضمامة زهر
داس الزهـور
جرعنى كاسات الكـدر
ما راعى للقلب الحزين
والفيه عايش من سنين
جوه الضلـوع فرهد كبر
00ـ0
ياحليله قال سايب البلـد
كم ليل طويل
وانا جفنى لا نام لا غمـد
مشدوه امام لوحة جمـال
لى حسن اخاذ ما اتوجد
الوانه بتداعب الخيـال
بى حرف ريان ما اتولد
النهد فيـها عنيد ..عنيد
عمره فى يوم ما سـجد
لى ربه لا اتهجد عبد
والوجه فى قلبى الحنين
من شفته لا زال لا ابتعد
وعيون بنظراتها الحنان
كم زول شقى ..كم زول سعد
قدامه كم مرهف بكى
قدامه كم فنان سجـد
قولوا الصلا ..ما تقولوا لا
تكفيه من شر العيون
من شر حاسد كان حسد
0ـ00
الليلة مالك يا زمان
تحسدنى فى اجمل نعـم
ما كنت عايش فى امـان
ما كنت تغمـرنى السـعاده
الصـادقه لا من يبتسم
يا حليـله لا من يبتسم
وآ حلاته وكتيـن يبتسم
ارحـل ...... اطيـر
فى كون نعم
واعيش على واحات عبيـر
تحملنى ارجوحـة نغـم
000
يا حليلو قال سايب البلد
من بعده كيف حال البلد
وكيف حال عيونا ما بتشوف
حسـنا براك ولا بترد
وكيف حال قليب ما عـرف
غيرك حنـانا اوعبـد
بعد السفر كيفن حياته
وكيف يضوق بعـدك سـعد
ما كان بسـبح للعيـون
لى سحرهن يا ما سجد
ما كان بيفتن بالخـدود
يا احلى فتـنه واحلـى خد
ما كان بينسى الدنيا لا مـن
حـرف مـن اسمك يرد
ما كان بمـوت بى نظرة منك
ويحيا بى هزة نـهـد
00ـ0
يا حليـله قال ناوى السفر
من بعده ما عارفين مصير
غير الدموع غيـر السهر
وعشـانه ما احلـى السهر
وعشانه ما احلى الدموع
الصادقه لا من تنهمـر
ما دموع رجال بتهد جبـال
هـداره زى رعد المطـر
ما حب عنيـف لكن رقيـق
فى لطفه زى انسام سـحر
من بعده مين يحـرق جبين
بى نظـره والحب يستعـر
مين يرضى بـى شاعر خجول
بيقضـى ليله مع القمـر؟
الحب عنده سفر خيـال
يـرتـاد بحـار.. يرتاد جـزر
مين يرضى بى انسان بعيـش
الدنيـا من اجل الشعـر
مين يفهـم الحـب البيسـرى
مع الانـامـل فى خـدر
مين يرضى بى فـنان
بيعصـر قلبه لو الحب امـر
مين يـرضى بى عابـد جمـال
عايـش وحيد بين البشر
الحـب عنده سفـر خيال
فى كون عـيون وقـت السحر
ميـن يـرضـى بى صيـاد حـروف
مكتول جمـال .. مصروع قدر
من بعـده مين يدّى الحنـين
ويكفكف الدمـع الطفـر
000
يا حليله قال نـاوى السـفر
حزن النهـار واللـيـل بـكـى
ودفق دموعه عليك بحـر
وآ غربة القـلب اللى عاش
يـا غالـى نشوان بيك عمـر
و آ ضيعـة النغم اللـى ذوب
نـفسه فى ثغـر الـوتر
بيغنى للوجـه الـصباح
و اللـيل عـلى خصلة شعر
و آ ريـدى يا سيد القـلوب
لى ضـو شـروقك .. للسـحر
و أ ريـدتى يا اجمـل صباح
و آ ريـدتى لليـل للقمر
يا ويلى من لحـظة وداع
آمالى فيـها تصير ذكر
يا ويـلى مـن عمـرا اعيشـه
براك يا واهـب العمر
0ـ00
يا حليـله قال سايب البـلد
ناوى الـسفر
كيف الوداع لامـن يحـين وقـت السفـر
اهـديك زهور ؟ حاشـاى وانت ندى الزهر
اهـديك حـروف؟ يا احـلى احرف فى الدهـر
اهديك حنـان ؟ ما قلبى عندك من زمـان
وانا راجى عطفـك منتظـر
اهديك دموع ؟ ما دمـعى سـايـل فيك بحر
اهديك نجوم ..معقوده بخيط الزهـر
باقات زنابق حلـوه .. فى لون القمر
ودمـوع محـب ... يا اغلى حب
من قلب فـى حبـك صبر
كـتم الغرام من سبعه عايش بالسـلام
لا قـال حـرف لا افـشى سـر
اهـديك خواطـر فى الخـيـال
فى حبـك اتـرامت زمر
اهديـك حب حيـر عـقول
من بـعـده قـلبى خلاص عقـر
حـب زول بعيش بالنظـره منك
وناوى تـحميه النظر
اهـديـك غـيوم
وقطيع نجـوم
ومحـب عفيف
بين الـنجوم هيمان سـدر
اهديك سحابه من الحـنان
تـحـمـيك دوام من كـل شـر
اهديك حـروف ما قالها زول
وما اظن يـقـولهـا وراى بشر
اهديك عيونى عـشان اتوب
الـدنيـا بـعـدك ما بتسر


عدل سابقا من قبل أبوالمنذر في الجمعة 22 أكتوبر - 23:25:52 عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عبد الجليل ابوعاقلة



المساهمات : 160
تاريخ التسجيل : 04/10/2010
العمر : 55

مُساهمةموضوع: تعليق علي قصيدة ود البلد (سيد البلد)   الجمعة 22 أكتوبر - 20:05:30

تعليق علي قصيدة ود البلد
يعجبنا اخي القصيد الجميل حتي في الغرام والعشق واي قلب لايحمل الحب يكون صاحبه جامد والمعني الجميل يعجب أي انسان وكما قيل من كانت نفسه بغير جمال لايري في الوجود شيئا جميلا ولكن احيانا تستوقفنا بعض الكلمات في القصيدة وقد يغلوا الشاعر في قوله ونترك قوله ومرات يتجاوز الشاعر الحد في القول فنقف عند كلماته التي لاتقال الا في شان الله كالسجود والعبادة ومعاني اذا سكت عليها القاري اما يكون جاهلا بمقصودها ومعناها واما مجاملا صاحبها وحتي لاينزلق شبابنا نريد ان نقف وبكل تقدير واحترام لكتاب الكلمة الحلوة والمعبرة ان يتغنو بالجمال وان يكتبوا عن الجمال لكن في حدود لاتتعدي القيم والاخلاق او تمس المعتقدات والعبادة وماحلي التغني والتغزل في ثوب العفة وقد قال الرسول صلي الله عليه وسلم في حديث ما معناهـ ( من حب وعف له الجنة ) ، فاستوقفتني بعض الكلمات وسوف اشير لك عليها مثلا
النهد فيـها عنيد ..عنيد
عمره فى يوم ما سـجد
لى ربه لا اتهجد عبد
فيها مدح للعنيد العاصي الذي لايخشع ولايذل ولايسجد لله فياله من طرف عنيد وجافي قطعا مابكون حنين، وكذلك
شوفوا القلوب كيف تأتمر
لو مرة سيد الناس امر
بى نظره بتذوب حجـر
بى بسمة بطول عمر
هذه العبارة ليس فيها غلو في المعني ولكن تكرني بكتابة الرسائل التي يقول صاحبها سلاما اذا مر بالجبال هداها واذا مر بالبحار عكر صفاها واذا مر بصديقه هذا ماذا يفعل له ؟
فكيف بنظرة المحبوب الرقيق ان تذوب الحجارة ؟
كم زول شقى ..كم زول سعد
قدامه كم مرهف بكى
قدامه كم فنان سجـد
ولا اعلم سجودا عزيزي لغير الله واريد ان توضح لنا معني سجدة هذا الفنان ، وفي الاثر لو كنت آمرا احدا ان يسجد لااحد لاامرت المراءة ان تسجد لزوجها
مين يـرضى بى عابـد جمـال
عايـش وحيد بين البشر
الحـب عنده سفـر خيال
فى كون عـيون وقـت السحر
الشاعر لايرضي بالشاعر الذي يعف ويقف عند حدود ضيقة ولكن لايرضي حتي بالشاعر الذي لايتعدي الرومانسية في شعرة ليصل الي اهدافه في الحب والتي لاتدل علي عفتها من المفردات
اخي ارجو التعليق علي الموضوع علما اني ارغب في ان اري الكثير من الاشعار والمشاركات في هذا المنتدي ولاباس ان يعلق أي احد علي أي موضوع لتعم الفائدة
مع تحياتي عبد الجليل ابوعاقلة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.go-board.com/profile?mode=editprofile
أبوالمنذر

avatar

المساهمات : 147
تاريخ التسجيل : 26/08/2010

مُساهمةموضوع: رد: ســيـد البلد   الجمعة 22 أكتوبر - 23:37:04

أخي عبد الجليل .. تحياتي على مرورك ومناقشتك للقصيدة ..

احترامات كبيرة لآرائك حول القصيدة .. ولا أستطيع الرد على (النقدي) منها .. فهذا شغل النقاد والأدباء .. وأترك هذا لذوي الشأن في المنتدى ..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
ود رغوة 32



المساهمات : 19
تاريخ التسجيل : 22/10/2010

مُساهمةموضوع: رد: ســيـد البلد   الجمعة 22 أكتوبر - 23:53:37

ابو المنزر يا روعة واشكرك على هذا لانني من عشاق الساحر حمد الريح

في البداية قلت الزول دا بقى هلالابي ولا شنو من العنوان

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
ســيـد البلد
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
سودان قوو :: المنتديات الثقافية :: الأشعار والدوبيت-
انتقل الى: