الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 في وداع قمر الدولة مكي يوم رجوعه للسودان

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عبد الجليل ابوعاقلة



المساهمات : 160
تاريخ التسجيل : 04/10/2010
العمر : 54

مُساهمةموضوع: في وداع قمر الدولة مكي يوم رجوعه للسودان   الإثنين 15 نوفمبر - 2:54:15

في وداع قمر مكي يعقوب
انه وفي يوم الخميس الموافق 14/4/2003 م لقد سافر من الدوادمي للسودان الأخ قمر الدولة مكي يعقوب بعد عشرة طويلة قضاها مع الأخوان بالدوادمي وكان قمر قمرا في سماء الدوادمي حيث انه كان مواصلا ويتفقد أحوال أخوانه وكان لين الجانب وكان قمر كريما مضيافا وخدوما يسعي في حل مشاكل الناس ويقوم بعمل اللازم لمن تحصل له أي مصيبة ، وكان دائما سباق لعمل الخير وكان ميسور الحال بطبيعة عمله في الذهب وكان زاهدا في جمع المال وكل من عرفه عرفه زاهدا ومتواضعا لايستعلي علي احد وكان صديقا لكل الفئات وأخ لكل ناس الدوادمي وأصبح بائنا لذلك في يوم وداعه ، وفي نفس اليوم وفي نفس الجلسة التي ودعنا فيها قمر ودعنا اثنين من الدكاترة الأعزاء وهم دكتور عفت دياب ودكتور فتح الرحمن محمد إدريس والحقيقة إنهم كانوا أعلاما ولحيث إننا تربطنا بالأخ قمر علاقة خاصة كتبنا فيه القصيدة ولم نقصد أن نميزه عن أخوانه المودعين بل لقد وجدنا الحرج عندما كثرت القصائد في وداعا حتى بكي في نفس اللحظة ولم يستطع أن يعبر عما في نفسه من شعور فجاش بالبكاء وكان له اثر في أنفسنا فزاد من حبنا له واظهر مدي صدقه وحبه للناس وقربه منهم فله التحية وللإخوان الذين سافروا منا واستقروا بالسودان نسال الله لهم التوفيق
وأراد الأخ عمر حبوش أن يمدحة بقصيدة ود الشلهمة شاعر البطانة والتي قالها في صديقة وبعدما استباح الناس عذرا والحاضرين قال لهم أيها الأخوان لقد راءيت معاني قصيدة ود الشلهمي التي سوف ألغيها علي مسامعكم تنطبق في أخونا قمر وصديق ود الشلهمي ورفيقه هذا قد سانده وعالجه من المرض ووقف معه مواقف تاريخية جعلته يري نفسه فيه ،
يقول عمر حبوشي علي لسان ود الشلهمي
رفيقي الدنيا ماسوت هوس في راسو ***رفيقا قلبو مو قرعوبة جابر ساسو
رفيقا ضارعو بالهاشمي وعرفتا مقاسو ***رفيقا في البشوفُن مافي تب ود كاسو
مجاراة عبد الجليل
القمر البشوف توب الوقار فوق راسو ***يعقوبابي وأصيل في العزة قالق ساسو
الموصوف بالكرم وارث سمح الصفات من ناسو **عالي مقامو وقاسي في المية تلقي مقاسو
عمر
رفيقا مو الطرورة علي التفيهة بدلك *** رفيقا مالو ليك وهن انقبضتا بحلك
مابدورك ملان ويعاف يباسك وقلك *** رفيقي الواجبة هن نطيت حدودا بذلك
عبد الجليل
رفيقا مسامح وعلي العديلة بدلك ***وقضاي قروض وهن وقعت مصيبة بحلك
رفيقا مابتكبر عليك وبشوف يباسك وقلك **رفيقي هن خالفتو زي الشجرة الظليلة بظلك
عمر
رفيقا اصلو ماظنيتو اقطع الومك ***رفيقا يقل طمع نفسو ويندر كومك
ر فيقي هن جيتو مضكر كربت قدومك ***بترجع منو عريانا تشيلها هدومك
عبد الجليل
رفيقا بقبل عذرك وهن قصرت تب مابلومك**رفيق الحارا وفي حضرتو تنسي همومك
ورفيقا هن والاك عنايتو نوم وواصل نومك***ويوم الحارا بشتت شملوا بقضي لزومك
عمر
اتعبتك تعب موت وانت عندك راحة ***وإخلاص من ضميرك بيبشاش وصراحة
إياك توب قدلتي الخايلة فيه اللفاحا ***نفرا توزن الجمهور عبار ومساحا
عبد الجليل
الصدرو هن ضاق لي صديقو عندو مساحا ***وفيهو صفات المؤمن الاترجة والتفاحا
رفيقي حمل الهموم بلقي فيهو الراحة ***وباسم ديمة وجهو وطبعو فيهو سماحا

عمر
ايدك لخراب كوم القروش ملهوفة ***وسراقا عطيتك زول حرام مابشوفا
قضاي البتصعب في ليالي السوفا ***قلبك في القلوب فيهو اختلاف مو دوفا
عبد الجليل
وارث العز قديم وجدك بركب المعلوفا ***وعطيتو خفية القريب مابشوفا
النفسو مي في ايدو وبي خراب القروش موصوفا ***بفش الضيم قناع سترة المكشوفا
عمر
رفيقي مو النعجة البغشك وانقلب بتعذر ***وعلي الدبر أبوعا بشيل الحمل ماتفذر
المال غير شكر انشا الله سيدو معقر ***هن زاح علو سايب مو عتودا نقر
عبد الجليل
رفيقا معروف بالسماح ليهو ماتتعذر ***والمبذول في الخير من حقو ماهم مبذر
الفارس البواجه في كعبو مابتعقر ***وهن مات تاريخ نباه مسطر
عمر
رفيقا ........................................................................1
رفيقا ......................................................................2.
عبد الجليل
هن جاهو الصديق حاشاهو موعاتاب ***ولي حفظ السر خزنة مودولاب
الصاين عرضو وحاشا مو لعاب *** فارس حوبة وفوق الخيول ركاب
عذرا لقد ضاعت مننا 6 مقاطع(نرجو من الاخ عمر يسعفنا بها) 2
عبد الجليل
رفيقي العزيز وبي معروفي ماتفشيت *** قمر الزمان بي حضرتو ضوا البيت
هن قصدت دارومن غير عشاء اتعشيت *** وكتبره فعالو مابعدتا المتلي بالدوبيت
عبد الجليل
فارس الدهلات ساعة تزورو بزح *** وكم زليت خصيم خليت خصيمو يوح
ماك ربيان بالصدق من قمت تقول الصح***والمتلك محال جود عطاهُ يشح
مع تحيات عبد الجليل ابوعاقلة


عدل سابقا من قبل عبد الجليل ابوعاقلة في الإثنين 15 نوفمبر - 3:10:38 عدل 2 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.go-board.com/profile?mode=editprofile
عبد الجليل ابوعاقلة



المساهمات : 160
تاريخ التسجيل : 04/10/2010
العمر : 54

مُساهمةموضوع: رد في موضوع وداع قمر الدولة مكي يوم رجوعة للسودان   الإثنين 15 نوفمبر - 3:06:02

في وداع قمر
اليوم الموقف صعب علينا شوية لأننا نودع فيه أخوان أعزاء علينا قضو معنا فترة طيبة بالدوادمي ولحيث إن بعض الأخوان كانت تربطنا بهم علاقة خصوصية فليسمحوا لي الأخوان د عفت دياب ودكتور فتح الرحمن وهم والله مفقودين في مجتمعنا وقدموا الكثير ولا يجحد فضلهم احد بل الكل يشهد بدورهم وبأخلاقهم فقد مثلوا السودان خير تمثيل ونتمنى لهم حياة طيبة في السودان وليسمحوا لي أن أعطي أخونا قمر مساحة بسيطة لأني سمعت بعض القصائد قدمت وأناء نيابة عن بعض الأخوان المقربين من الأخ أبو عوه ( قمر الزمان) أن ارتجل لكم هذه القصيدة عن مجموعة شبكة نت فأقول
حليلو القمر الضوه *** حليلو خليل الخوة ***حليلو الحفل بنات حوا *** حليلو أخونا أب عوه

حليلو عشا البايتات ***حليلو مقنع الكاشفات *** حليلو قضاي الحاجات *** حليلو خلانا الهميم لخبات

حليلو دخري الحوبة **حليلو مصاص القورو واللالوبة *حليلو خال عجوبة الخربت سوبا*حليلو الزرع اللالوبة

حليلو الفزعة للفرسان ***حليلو أكال الريسان ***حليلو شيال التقيل *** حليلو أكال المناديل

حليلو ركن الهوة ـــ حليلو الشبك البرا والجوة

حليلو أبو أمنية *** وبالتوفيق والنجاح والعيشة الهنية والحياة السعيدة وفي أحضان الوطن الغالي ونسال الله أن

يجمعنا في القريب العاجل في الحوش الماهل ـ شلة شبكة نت

مع تحيات عبد الوهاب حسن عبد الوهاب ـ العيلفون
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.go-board.com/profile?mode=editprofile
 
في وداع قمر الدولة مكي يوم رجوعه للسودان
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
سودان قوو :: المنتديات الأسرية والاجتماعية :: منتدى الاجتماعيات العامة-
انتقل الى: