الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 الف حمدالله علي السلامة عبد الوهاب العيلفون

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عبد الجليل ابوعاقلة



المساهمات : 160
تاريخ التسجيل : 04/10/2010
العمر : 54

مُساهمةموضوع: الف حمدالله علي السلامة عبد الوهاب العيلفون   الإثنين 15 نوفمبر - 3:00:53

ألف سلامات عبد الوهاب العيلفون
ألف حمد لله علي سلامة آخونا عبد الوهاب حسن عبد الوهاب الشركة الوطنية للتوزيع وفي حفل العشاء الذي اقيم بهذه المناسبة ووجدت فرصة وقدمت فيها هذه الكلمات البسيطة بالشعر عن الأخ عبد الوهاب والحقيقة كلماتي تعجز أن تقول فضائل هذا الرجل فهو دائما مبتسم وهو طلق الوجه ويده مبسوطة بالخير لكل الناس وهو المضياف الذي يعمل لله ونحسبه من الخيرين ولااريد أن أذكيه علي الله ولعلمي بتواضعه واصالته فليسمح لي لأني اعلمه لايقبل المدح ولكن هذه أشياء يعرفها في عبد الوهاب كل من عاشره وعرفه ومن الصدف الطيبة أن أوفق في أول يوم وقبل كذا ــــــــ مابوريكم عشان ماتقولو كبير أول إنسان اقابلني بعد قدومي من السودان للدوادمي بالسعودية الأخ عبد الوهاب واستقبلني وضيفني ورحب بي أيما ترحيب وبعدما استقر بي المقام بالدوادمي عرفتها من صفاته الاستقبال والضيافة وأقول فيه بلهجة ناس البطانة بالدوبيت
يوم وصلت فيه الدوادمي لقيت أبو الصديق لي ضيفو بخدم حافي

وقابلني بالترحاب وبشاشة سلام ابدتلي كرما ضافي

ياابو الصديق الكريم فيك الوصف مو كافي

ولانك صاحب مروة وهمة والطيبة الفيكا فايقا أوصافي

ياود الفوارس يا أبو قلبا حنين مو جافي
ألف كفارة ومن المرض عوافي

ويارب العباد اشفيه وأنت الشافي

وبعد الكبر من المرض أصبح شديد متعافي

ياصاحب القمر والهميم والصافي

انشأ الله تنعم بالصحة وتقوم من المرض متعافي

مع تحيات عبد الجليل ابوعاقلة كمر العليش
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.go-board.com/profile?mode=editprofile
عبد الجليل ابوعاقلة



المساهمات : 160
تاريخ التسجيل : 04/10/2010
العمر : 54

مُساهمةموضوع: كلمة وداع للنور مكي رئيس الجالية في احتفال عبد الوهاب العيلفون   السبت 11 ديسمبر - 5:18:01

ولحيث إن السيد النور مكي كان رئيسا لجاليتنا السودانية بالدوادمي لفترة طويلة قضاها كلها في حل مشاكل الناس وفي السعي الحثيث لتفريج كربهم ، حتى أصبح مقصودا بين كل الناس وهو من الناس الذين لايعرف ـ لا ـ أو مابقدرــ أو مابعرف ، والحمد لله قد عاشرناه عن قرب في فترة كانت من أجمل الأيام التي قضيناها بالدوادمي وقد لايعرفوها حتي أخوانا الجدد بالدوادمي ، وقد تزاملنا مع بعض في دروس الشيخ عبد الله فضل الله ذاك العالم الموهوب المجهول لدي وسائل الإعلام السودانية ، والنور يراه أي سوداني بالدوادمي في كل مناسبة وفي كل جمع من أول الحضور ومن أخر المنصرفين يدفع من جيبه ويجمع من إخوانه ، والنور لمن عرفه قال مهما قلت عنه لا أوفيه ولمن لايعرفه سوداني يحمل كل قيم الخير والصدق والنبل والكرم يخدم من يعرفه ومن لم يعرفه ولحيث انه قد سافر منا للسودان ورفض التكريم ولم تتاح لنا فرصة لنكرمه ،فهو مكرم في نفوسنا جميعا وحضر في هذه الأيام بالصدفة واليوم شرفنا في هذه الجلسة ، فاسمحوا لي أن أحيه نيابة عنكم في هذه السانحة علي شرف العشاء الذي أقيم بمناسبة مثول أخونا عبد الوهاب للشفاء فاسمحوا لي أن أرحب به نيابة عنكم وأقول

مرحب حباب النور المزاجو مابتعكر
وحبابو الاجواد البيتو ( مابسكر)
وحباب رئيس جاليتنا وبيها مابشكر
وحبابو المابننساهـ كان نذكر

وعندما قلت إخوتي رئيس جاليتنا وبيها مابشكر لأني اعرفه زول مبادي والحمد لله كان لي الشرف أن أرشحه يومها رئيسا للجالية لما عرفناهـ عنه من قيم وهنا يذكرني قول أبو الطيب المتنبي عندما قال مادحا لسيف الدولة

هبك تركتها وخرجت منها أتخرج ماعليك من الجمال

لأنه يري سمح الخصال في ممدوحة أجمل وأحسن من حلة ثياب الأمارة والسلطة وهكذا الحال في النور رئيس جاليتنا ـ وعذرا لي أخوانا ناس البطانة ناس عمر الشيخ ديل كان أدخلت لهم مفردات سعودية مابسكر أي بيته مابنقفل ومفتوح للضيوف دائما وبقول

النور اسم ومسمي محاسنو مابتتعدد

والنور ضو القلوب بيهو الظلم بتبدد

النور الودود دائما للرفيق بتفقد

النور معروف والقاصدو مابتودد

البقضي القرض في حينو مابتردد

رئيس جاليتنا البيتو مفتوح مابسدد

ودعنا الشايقي السخي الكرمو مابتحدد

ومابفرز بعيد وفي الفانية مابتشدد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.go-board.com/profile?mode=editprofile
عبد الجليل ابوعاقلة



المساهمات : 160
تاريخ التسجيل : 04/10/2010
العمر : 54

مُساهمةموضوع: كلمة عن عبد العظيم الحاج في احتفالية عبد الوهاب العيلفون   السبت 11 ديسمبر - 5:31:35

وفي نفس جلسة العشاء التي اقيمت بمناسبة شفاء أخونا عبد الوهاب أبو الصديق ود العيلفون حضر إلينا وشرفنا أخونا أمين الصندوق للجالية السودانية الأخ عبد العظيم الحاج بعدما انهي عمله بالهاتف السعودي وسافر للسودان ووصل لنا وهو عابر من ابنه بالشرقية وراجع للسودان
فاسمحوا لي أيها الإخوة الحضور أن أحييه وارحب به نيابة عنكم وهو دائما يذكر مع النور رئيس الجالية مثل ( Q u ) كيو يو وهم دائما مع بعض وقبل قليل قد رحبنا بالنور واتصلنا علي النور وقال لنا في طريقه إلينا وها هو قد وصل والحمد لله ولحيث إني اعرفه زول شهم ومتواضع ولا يريد الثناء ولكن فليسمح لنا أن نعبر له اليوم ببعض الكلمات وهو رجل تعجز الكلمات عند المثلي أن يقول عنه وليتني كنت مثل الشاعر يوسف البناء لااقول لكم عنه وفي هذه السانحة أيها الإخوة اسمحوا لي أن احيي الشاعر يوسف البناء رائدنا في البطانة في شعر الدوبيت وسمعت منه انه قال يسهل لك الشعر عندما تقول في الرجل الكريم والزول المستحق للشكر لانك تجد نفسك تقول وأنت مسنود وخاصة عندما يكون الممدوح معروف للجميع كما في حال عودنا عبد العظيم الحاج ولا اعرفه بالخرطوم أو ام درمان بل بقول ود السودان فأقول
حبابك عشرة ياشيخ العرب شرفتا جيت غاشينا
وحبابك يالكريم دائما بالبشاشة والحفاوة بتلاقينا
وحبابك عشرة بمعاني الشعر ألفي اصالتو ربينا
حباب شيخ العرب الذبيحتو ديمة سمينا
وفراقك يالكريم والله احزنا اثر فينا
ياهطال الخريف البيهو بتصح العينا
ويوم سفرك لقيت الفراق دموعو سخينا
وعدم الوداع حرك في معاني دفينا
وسعدنا إخوتي اليوم والله أيما سعادة أن نجد هؤلاء الإخوة النور وعبد العظيم بيننا بعد فترة قضيناها معهم ولحبنا لهم وللعلاقة الخصوصية للإخوة السودانيين بالدوادمي فنحن نعتبرهم نواة للذي يرجع مننا للسودان لأنهم أصبحوا يتفقدوا بعض وعملوا مجموعة الدوادمي بالسودان
فبقول عبد العظيم عودنا قاسي تلقي مثيلوا
زعيمنا الوفي وعمل خيرنا باقي دليلو
حباب عودنا الاصلو المكارم هيلو
وحباب جبل الضرا وحظ المتلي ابقي خليلو
بتشيلو بالطيب وهن حصل القصار بتقيلو
المكانو القلوب وفي حدقات العيون بنشيلو
سيد المقام السامي بالأدب الرفيع احكيلو
عودنا قضاي القروض عند المحن نمشيلو
وحزن القلب يوم فات وشفنا رحيلو
عودنا بنطرا مواقفو ومن القلب ندعيلوا
الزاهد يوم رفض الوداع قلنا شن بنسيلو
عودنا سمح الخصال في نظري فايت جيلو
وارث السمتا ولي حمل الضعيف بتشيلوا
يالمن تركة جعل في الفانية مابتميلو
وهذه الأبيات بشعر أهلنا ناس البطانة واراها لاتفي بحق رموز جاليتنا السودانية بالدوادمي الذين افنو شبابهم في خدمة الآخرين فلهم التحية ونقول لكل واحد منهم ماقاله المجذوب
ستبقي فينا وتاجا قد صنعناه بايدينا علي الجرح الذي يمضي مع الجرح الذي فينا
فان ضاقت بنا الأرض فأنت الأرض تكفينا وأقول لهم ماقاله سيدنا عمر لسيدنا أبو بكر عندما رآه لايتسابق في عمل الخير أتعبت من يأتي من بعدك يابوبكر فاتعبوا والله من يأتي بعدكم
عبد الجليل ابوعاقلة محمد ـ كمر العليش محلية ام القري ـ السعودية ـ الدوادمي 15رمضان 1430هـ ت 0508821527
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.go-board.com/profile?mode=editprofile
عبد الجليل ابوعاقلة



المساهمات : 160
تاريخ التسجيل : 04/10/2010
العمر : 54

مُساهمةموضوع: من م شبكة نت بمدني لعبد الوهاب العيلفون   السبت 11 ديسمبر - 5:49:35

من م شبكة نت بمدني للإخوان بالدوادمي
وحيث كان أهل السودان بطبيعتهم يلتقوا في الافطارات الجماعية في رمضان إلا أن بعض أفراد هذه المجموعة مجموعة نت كانت لهم روابط أخوية وعلاقات حميمة وتجمعهم ليالي الذكر والافطارات الجماعية الرمضانية وفي نفس اليوم الذي عمل به الأخوان بالدوادمي الكرامة للأخ عبد الوهاب حسن عبد الوهاب أبو الصديق أو سميه عبد الوهاب العيلفون وهو زعيم كبير في مجموعة نت ، كان الأخوان قمر والهميم في مدني مجتمعين في منزل الأخ مصطفي واتصل عليهم الأخ الطيب الصديق ليبشرهم بتمام صحة عبد الوهاب وقال لهم إن أبو الصديق مبسوط ومعه الجماعة أصحابه ناس مبارك طه ( وهو رجل زعيم ومعروف في الدوادمي بعلاقاته الواسعة وبخدماته وبطيب معشره وهو من أبناء الشمالية ومن قبيلة المحس وهو صديق لهذه المجموعة ) وعوض ، وكعادة الأخ قمر دائما ( بلخبط الكيمان ) وبخلق جو الدعابة والمزاح ووجد الهميم بجواره فأراد أن يفتنه في أصحابه ناس عوض باقي مجموعة نت بالسعودية ، فقال قمر : للطيب عودنا أبو الصديق مالو ؟ عملتو ليهو عملية شنو ؟ والهميم بقول ناس عوض سحروهو وعوض زول شيخ وصديق أبو الصديق ومبارك طه ومجموعة نت
ونقل علي لسانهم الطيب هذه الأبيات من الهميم الصادقابي

سلامة عودنا الوفي *** ومع الرفيق وقاف
عبدالوهاب المحسي الكريم *** من تركة الأشراف
ياعودنا سلامتك وعليك *** من عين ناس عوض بنخاف
ونعوزك من السحر *** بياسين والبقرة والأعراف

وحيث إن مع مجموعة نت بالمملكة الأخ مبارك طه وهو صديق أبو الصديق وصديق عوض أردت أن أقول له أنت متهم بالسحر فقال لي ياعبد الجليل ماتكون لخباط وأنا ماسحار ولكن عوض دا لازم أرد اعتباره من الجماعة ديل ولحيث أن مبارك طه صديق لمجموعة شبكة نت أراد أن ينتصر لعوض ورد علي قول الهميم الصادقابي وقمر الدولة بمدني بقوله

عودكم خليتوهو وراكم *** اتكعكع ماسك المقداف
وعرفناهو زولا طيب ***وفي الشينة اصلو مابنشاف
وحليلو من الكبر ( وبعاين في العود وبضحك) أصبح قومتو بالأطراف
وسلامتو مو مسحور *** مدني الطباع الساكن الاراف

فاعجب بهذا الرد الطيب الصديق ولحيث انه صديق الجميع قال لمبارك صح لسانك وامكن العود ساحرنو هم ، (يقصد السافرو للسودان ناس قمروالهميم )
وهمس في أذن مبارك وقال ليهو بيني وبينك دي مي عين لكن دا الكبر
ياعوض عودهم فارس واصلو مو خواف *** وحليلو أبو الصديق الكريم الوفي ومضياف

واطرق مبارك طه مليا ثم أراد أن يحرض عوض وقال له ضاحكا أول يوم أعرفك انو انت سحار وصاحبناك كيف ماعارف فقال له أشوف أبو الصديق همس في اذنك أم علموك علينا أللخبطة ، وهنا حاول مبارك أن يكون جادا وقال له لابد أن ترفع قضية للعمدة أبو وليد أو إلي العود الكبير(عبد العظيم ) وعندي تلفون مجذوب ومجموعة الخرطوم فقام عبد الوهاب وقال معليش ومامكن نخبر ناس الخرطوم ونصعد المسالة مابتستحق ولكن ممكن ترفع للعمدة ابووليد
فكتب عوض قائلا
سلامي للعمدة الرشيد *** قائدنا أبوك ياوليد
وقالوا عبد الوهاب مسحور *** وانت كنت فينا عميد
وكان أصلك جعلي *** بتحكم لينا ومابخوفك تهديد
وأنا جاني الاتهام *** من زولا قريب مني ماهو بعيد
وكيف نسحر عبد الوهاب *** ونحنا الكتبنا فيهو قصيد
وانت عارف الهميم *** لمن الاقي القمر الفتن بزيد
ومبارك زعلان ومابكلمك *** وقال طالب من القمر تعويض
(وهنا طلبو التعويض من قمر لانهم عارفين انو قمر بدفع رقم انه لم يقول بكلام السحر وكلام السحر قال بيهو الهميم ود الشيخ احمد )
فقال لهم أبو الوليد ابشرو بالتعويض
وبكرة بندرس القضية بي همية *** وسلامة عودنا النفسو ديمة رضية
وكيف شلة نت العندي مي منسية *** والهميم حركتو علينا ماها غبية
ولازالت القضية تحت النظر عند العمدة ابووليد والباقي في الحلقات القادمة
مع تحيات عبد الجليل ابوعاقلة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.go-board.com/profile?mode=editprofile
 
الف حمدالله علي السلامة عبد الوهاب العيلفون
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
سودان قوو :: المنتديات الأسرية والاجتماعية :: منتدى الاجتماعيات العامة-
انتقل الى: